Mazahimat سنڌ جي قومي ويب سائيٽ
(ڊيسڪ رپورٽ) دنيا جي 75 سيڪڙو آبادي کي گهرن تائين محدود ڪندڙ ڪورونا وائرس سبب مجموعي طور تي هاڻ تائين 23 هزار ماڻهو فوت ٿي چڪا آهن، جڏهن ته 5 لک کان وڌيڪ ماڻهو عالمي وبا سبب متاثر ٿيا آهن. ڪورونا وائرس سبب سڀ کان وڌيڪ متاثر ٿيل ملڪ اٽليءَ ۾ فوتگين جو انگ 8 هزار کان وڌي ويو آهي، جڏهن ته 80 هزار 539 ڪيس سامهون اچي چڪا آهن. عالمي سطح تي ڪورونا وائرس جي نگراني ڪندڙ ويب سائيٽ موجب سڄي دنيا ۾ هاڻ تائين 23 هزار کان وڌيڪ ماڻهو حياتيون وڃائي چڪا آهن ۽ هڪ لک 20 هزار ماڻهو صحتياب به ٿيا آهن. ويب سائيٽ موجب، دنيا ۾ وائرس سبب سڀ کان وڌيڪ متاثر ملڪ چين رهيو، جتي متاثرن جو انگ 81 هزار کان وڌيڪ رهيو پر هاڻ اٽليءَ ۾ انگ تيزي سان وڌي رهيو آهي. اٽليءَ 80 هزار ڪورونا متاثرن سان ٻئين، آمريڪا 75 هزار کان وڌيڪ متاثرن سان ٽئين ۽ اسپين 56 هزار کان وڌيڪ متاثرن سان چوٿين نمبر تي آهي. جرمني ۾ 43 هزار، ايران ۾ 29 هزار ۽ فرانس ۾ 25 هزار متاثر رپورٽ ٿيا آهن، جن کانپوءِ متاثر ٿيل ملڪن ۾ سوئٽزرلينڊ، برطانيا، اتر ڪوريا ۽ نيدرلينڊز آهن. ڪورونا جي مريضن جو علان ڪندڙ طبي عملو به وائرس سبب وڌيڪ خطري ۾ آهي، متاثر ماڻهن سان رابطي سبب ڪيترائي ڊاڪٽر حياتيون وڃائي چڪا آهن. فلپائن جي ميڊيڪل ايسوسيئيشن اعلان ڪيو آهي ته ملڪ ۾ 9 ڊاڪٽر ڪورونا وائرس سبب فوت ٿي چڪا آهن ۽ طبي عملي طرفان حفاظتي قدمن جي فقدان جون شڪايتن ۾ به واڌ آئي آهي. گڏيل قومن جي سيڪريٽري جنرل انتونيو گوتيرس خبردار ڪيو آهي ته قاتل ڪورونا وبا جي پکيڙ کي رڳو گڏيل عالمي ڪوششن ذريعي ئي روڪي سگهجي ٿو.
